И взем пятую частицу, полагает ю доле первыя, сущия началом втораго чина.

Таже глаголет: Преподобных и богоносных отец наших: Антониа, Евфимиа, Саввы, Онуфриа, Афанасиа Афонскаго, Антониа и Феодосиа Печерских, Сергиа Радонежскаго, Варлаама Хутынскаго, Серафима Саровскаго и всех преподобных отец; и преподобных матерей: Пелагии, Феодосии, Анастасии, Евпраксии, Февронии, Феодулии, Евфросинии, Марии Египтяныни и всех святых преподобных матерей.

И тако взем шестую частицу, полагает ю доле вторыя частицы, во исполнение втораго чина.

По сих же глаголет: Святых и чудотворцев, безсребреник Космы и Дамиана, Кира и Иоанна, Пантелеимона и Ермолаа и всех святых бессребреников.

И взем седмую частицу, полагает ю верху, творя третие начало, по чину.

Таже паки глаголет: Святых и праведных Богоотец Иоакима и Анны: (и святаго имярек, егоже есть храм и егоже есть день): святых равноапостольных Мефодиа и Кирилла, учителей Словенских: святаго равноапостольнаго Князя Владимира, и всех святых, ихже молитвами посети ны, Боже.

И возлагает осмую частицу доле первыя благочинно.

Еще же к сим глаголет: Иже во святых отца нашего Иоанна, архиепископа Константинопольскаго, Златоустаго.

Аще поется Литургиа его. Аще же поется Великаго Василиа, того поминает: Иже во святых отца нашего Василиа Великаго, архиепископа Кесарии Каппадокийския.

И тако взем девятую частицу, полагает ю в конец третияго чина, во исполнение.

Таже приемь четвертую просфору, глаголет: Помяни, Владыко Человеколюбче, всякое епископство православных, Святейшаго ПАТРИАРХА КИРИЛЛА, и Святейшыя Патриархи, митрополита или архиепископа или епископа нашего (имярек, егоже есть епархиа), честное пресвитерство, во Христе диаконство и весь священнический чин: (аще во обители) архимандрита или игумена (имярек), братию и сослужебники наша, священники, диаконы и всю братию нашу, яже призвал еси во Твое общение Твоим благоутробием, Всеблагий Владыко.

И взем частицу, полагает ю доле святаго хлеба.

Таже поминает Государыню, глаголя сице: Помяни, Господи, Благочестивейшую Благоверную Государыню ВЕЛИКУЮ КНЯГИНЮ МАРИЮ ВЛАДИМИРОВНУ: Благовернаго Государя Наследника ЦЕСАРЕВИЧА и ВЕЛИКАГО КНЯЗЯ ГЕОРГИА МИХАИЛОВИЧА, супругу его Благоверную КНЯГИНЮ ВИКТОРИЮ РОМАНОВНУ, сына их Благоверного КНЯЗЯ АЛЕКСАНДРА ГЕОРГИЕВИЧА и весь Царственный Дом.

Таже поминает, и ихже имать живых, по имени, и на коеждо имя взимает частицу, приглаголя: Помяни, Господи (имярек).

Таже взем пятую просфору, глаголет: О памяти и оставлении грехов Святейших Патриархов, Православных и Благочестивых Царей и Благочестивых Цариц, блаженных создателей святаго храма сего (аще во обители): святыя обители сея.

Таже поминает рукоположившаго его архиереа и других, ихже хощет усопших по имени. На коеждо имя взимает частицу, приглаголя: Помяни, Господи (имярек).

И конечне глаголет сице: И всех в надежди воскресения, жизни вечныя и Твоего общения усопших православных отец и братии наших, Человеколюбче Господи.

И взимает частицу. По сем глаголет: Помяни, Господи, и мое недостоинство, и прости ми всякое согрешение, вольное же и невольное.

И взимает частицу. И приемь губу, собирает на дискос частицы доле святаго хлеба, якоже бытии во утвержении, и не испаднути чесому. Таже диакон, приемь кадильницу и фимиам вложив в ню, глаголет ко священнику: Благослови, владыко, кадило.

И абие сам глаголет: Господу помолимся.

И священник молитву кадила: Кадило Тебе приносим, Христе Боже наш, в воню благоухания духовнаго, еже приемь в пренебесный Твой Жертвенник, вознизпосли нам благодать Пресвятаго Твоего Духа.

Диакон: Господу помолимся.

Священник, покадив звездицу, полагает верху святаго хлеба, глаголя: И пришедши звезда ста верху, идеже бе Отроча.

Диакон: Господу помолимся.

Иерей, покадив первый покровец, покрывает святый хлеб с дискосом, глаголя: Господь воцарися, в лепоту облечеся: облечеся Господь в силу и препоясася, ибо утверди вселенную, яже не подвижится. Готов престол Твой оттоле, от века Ты еси. Воздвигоша реки, Господи, воздвигоша реки гласы своя, возмут реки сотрения своя, от гласов вод многих. Дивны высоты морския, дивен в высоких Господь. Свидения Твоя уверишася зело. Дому Твоему подобает святыня, Господи, в долготу дний.

Диакон: Господу помолимся. Покрый, владыко.

Иерей же, покадив вторый покровец, покрывает святый потир, глаголя: Покры небеса добродетель Твоя, Христе, и хвалы Твоея исполнь земля