(Служебник. – Пг.: Синодальная типография, 1916. – С. 70-306.; Внесенные изменения: поминовение Святейшего Патриарха Московского и всея Руси и замена имен Главы и Членов Царственного Дома в соответствии с его нынешним состоянием)
Хотяй священник Божественное совершати тайнодействие, должен есть первее убо примирен быти со всеми и не имети что на кого, и сердце же, елика сила, от лукавых блюсти помыслов, воздержатися же с вечера и трезвитися даже до времени священнодействия. Времени же наставшу, входит во храм, и соединився со диаконом, творят вкупе к востоку пред Святыми дверьми поклонения три.
Таже глаголет диакон: Благослови, владыко.
Священник: Благословен Бог наш всегда, ныне и присно, и во веки веков. Аминь.
Начинает глаголати диакон: Царю Небесный: Трисвятое по Отче наш:
Священник: Яко Твое есть Царство:
Таже глаголют:
Помилуй нас, Господи, помилуй нас: всякаго бо ответа недоумеюще, сию Ти молитву, яко Владыце, грешнии приносим: помилуй нас.
Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших: но призри и ныне, яко Благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и Имя Твое призываем.
И ныне: Милосердия двери отверзи нам, Благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.
Таже отходят ко иконе Христове и целуют ю, глаголюще: Пречистому Твоему образу покланяемся, Благий, просяще прощения прегрешении наших, Христе Боже: волею бо благоволил еси плотию взыти на Крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Таже целуют и икону Богородицы, глаголюще тропарь: Милосердия сущи источник, милости сподоби нас, Богородице, призри на люди согрешившыя, яви, яко присно, силу Твою, на Тя бо уповающе, радуйся вопием Ти, якоже иногда Гавриил, Безплотных Архистратиг.
Таже приклонь главу, иерей глаголет: Господи, низпосли руку Твою с высоты святаго жилища Твоего и укрепи мя в предлежащую службу Твою: да неосужденно предстану страшному Престолу Твоему и безкровное священнодействие совершу. Яко Твоя есть сила и слава во веки веков. Аминь.
Таже творят и к ликом поклоны по единому: и тако отходят в жертвенник, глаголюще: Вниду в Дом Твой, поклонюся ко храму святому Твоему в страсе Твоем. Господи, настави мя правдою Твоею, враг моих ради исправи пред Тобою путь мой. Яко несть во устех их истины, сердце их суетно, гроб отверст гортань их, языки своими льщаху. Суди им, Боже, да отпадут от мыслей своих: по множеству нечестия их изрини я, яко преогорчиша Тя, Господи. П да возвеселятся вси уповающии на Тя, во веки возрадуются, и вселишися в них: и похвалятся о Тебе любящии имя Твое. Яко Ты благословиши праведника Господи, яко оружием благоволения венчал еси нас.
Вшедше же во святилище, творят поклоны три пред Святою Трапезою и целуют Святое Евангелие и Святую Трапезу. Таже приемлют в руки своя кийждо стихарь свой, и творят поклоны три к востоку, глаголюще в себе кийждо: Боже, очисти мя, грешнаго, и помилуй мя.
Таже приходит ко священнику диакон, держа в десней руце стихарь со орарем, и подклонив ему голову, глаголет: Благослови, владыко, стихарь со орарем.
Священник глаголет: Благословен Бог наш всегда, ныне и присно, и во веки веков.
Таже отходит диакон во едину страну святилища, и облачится в стихарь, моляся сице: Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.
И орарь убо целовав, налагает на левое рамо. Нарукавницы же налагая на руки, на десную убо, глаголет: Десница Твоя, Господи, прославися в крепости: десная Твоя рука, Господи, сокруши враги, и множеством славы Твоея стерл еси супостаты.
На левую же, глаголет: Руце Твои сотвористе мя и создасте мя, вразуми мя, и научуся заповедем Твоим.
Таже отшед в Предложение, уготовляет священная. Святый убо дискос поставляет о шуюю страну, потир же, еже есть святую чашу, о десную, и прочая с ними.
Священник же сице облачится: приемь стихарь в левую руку, и поклонився трижды к востоку, якоже речеся, назнаменует, глаголя: Благословен Бог наш всегда, ныне и присно, и во веки веков. Аминь.
Таже облачится, глаголя: Возрадуется душа моя о Господе, облече бо мя в ризу спасения и одеждею веселия одея мя, яко жениху возложи ми венец, и яко невесту украси мя красотою.
Таже приемь епитрахиль и назнаменовав, облачается ею, глаголя: Благословен Бог изливаяй благодать Свою на священники Своя яко миро на главе, сходящее на браду, браду Аароню, сходящее на ометы одежды его.
Таже приемь пояс и опоясуяся, глаголет: Благословен Бог препоясуя мя силою, и положи непорочен путь мой, совершаяй нозе мои яко елени, и на высоких поставляяй мя.
Нарукавницы же, яко выше речеся.
Таже приемь набедренник, аще имать, и благословив и, и целовав, глаголет: Препояши меч Твой по бедре Твоей, Сильне, красотою Твоею и добротою Твоею, и наляцы, и успевай, и царствуй истины ради, и кротости, и правды, и наставит Тя дивно десница Твоя всегда, ныне и присно, и во веки веков. Аминь.
Таже приемь фелонь и благословив, целует, глаголя сице: Священницы Твои, Господи, облекутся в правду, и преподобнии Твои радостию возрадуются всегда, ныне и присно, и во веки веков. Аминь.
Таже отшедше в Предложение умывают руки, глаголюще: Умыю в неповинных руце мои и обыду жертвенник Твой, Господи, еже услышати ми глас хвалы Твоея и поведати вся чудеса Твоя. Господи, возлюбих благолепие Дому Твоего и место селения славы Твоея. Да не погубиши с нечестивыми душу мою и с мужи кровей живота моего: ихже в руках беззакония, десница их исполнися мзды. Аз же незлобием моим ходих: избави мя, Господи, и помилуй мя. Нога моя ста на правоте, в церквах благословлю Тя, Господи.
